Danmarkimi politikki allanngoriartoq
Danmarkimi politikkikkut allanngortoqarpoq. Det Radikale Venstret Socialdemokratinit avissaarnerat qinersisartut iluarigunavippaat. Qinersisartunik isumasiuinermi Catinet-ip isumagisaani kingullermi ullumikkut qinersisoqartuuppat februaari 2005-imut naleqqiullutik Radikalit folketingimi issiatitaat arfinilinnik amerleriassagaluarput.
Isumasiuinerup aamma takutippaa VKR-it naalakkersuisunngussagaluartut, katillugit naalakkersuisunngortitsinermi piumasarisaasunik 90-inik issiatitaqalissagaluarmata.
Catinetip isumasiuinera apriilip ulluisa 18-iannit 22-iannut ingerlanneqartoq pivoq Radikalit siuttuat Marianne Jelved apriilip aallartilaarnerani tunuareersorlu. Jelved Socialdemokratinik ukiuni qulini illersuisimanerminik taamani kipititsivoq.
Qinersisartunik isumasiuineq VKR-it suleqatigiileqqissinnaaneranik eqqarsalersitsivoq, naak statsministeri Anders Fogh Rasmussen Venstreneersoq Dansk Folkeparti suleqatigalugu VKO-mik naalakkersuisuuteqarnermik kipititsiniarani sapaatip-akunnera kingulleq arlaleriarluni erseqqissaareeraluartoq.