Raajat akii pillugit aaqqigiinnginneq ippassaq naammassisoq Narsamut kinguneri annertupput, Narsamilu borgmesterip ersarinnerusumik paasitinneqartarnissani kissaatigaa.
-Sunaana uagut qinikkatut piareersartariaqaripput, taassuma akineqarnissaa massakkut piumasarivara, Narsami borgmesteri Kiista P. Isaksen oqarpoq.
Raajat akiinik isumaqatigiissuteqarnerup kinguneraa Narsap suliffissuanut raajanik tunisineq unitsinneqalermat, suliffiillu 75-it tungaanut amerlatigisut nalorninartorsiutaalermata. Borgmesterillu tamanna kamaatigeqaa, KNAPK-milu siulittaasoq Peter Olsen ippassaq Itisiliinermi apersorneqarnermini eqqunngitsumik oqaaseqarnerarpaa:
-Uanga atorsinnaajunnarpara inuit assigiinngitsunik oqariartuuteqaqattaarnerat. Assersuutigalugu ippassaq Itisiliinermi KNAPK-p siulittaasua Peter Olsen oqarpoq akuersaarnagu raajanik tunisassiorfinnik unitsitsinissaq. Kisianni isumaqatigiissut uanga massakkut tigummisanni takusinnaavara immikkoortut aappaanni allaqqasoq, raajarniat illoqarfinni raajanik tunisinermik unitsitsiffiusuniittut immikkut kiilumut 1 koruunimik ukiuni sisamani tapiiffigineqassasut. Tassa atsioqataaffigisimavaat, taamaammat eqqortumik oqaluttoqartalertoqartariaqarpoq. Pisariaqarpoq politikkikkut ersarissumik suna anguniarneqarnersoq aammalu sumut siunnerfeqarnersoq erserissarneqassasoq, Kiista P. Isaksen oqarpoq.
Kiista P. Isaksen-ip aamma naalakkersuisut akulerunnissaat kissaatigaa.
-Naalakkersuisoqarpugut marlunnk, Inuussutissarsiornermut naalakkersuisoq kiisalu Aalisarnermut naalakkersuisoq. Suunuku tunngavigalugit taama iliortut. Paaserusunnarsivoq, ersarissumik naalakkersuinikkut innuttaasunut saqqummertoqartariaqalerpoq, Kiista P. Isaksen oqarpoq.