Qaammatini arlalinni tamaviaarutaareersorlu maanna nunat avannaamioqatigiit timersortartui olympiade-mut peqataasalernissaminnik neriuutissaqalerput.
Danmarks Idræts Forbundip DIF-ip Toreno-mi ukiuunerani OL-ertoqarnerani naliliisoqarmat tamanna naliliinermut ilaatippaa. Naliliisimanerlu tamanna ullumikkut DIF-ip siulersuisuini oqaluuserineqassaaq, oqaatigineqarporlu ilaatigut nunat avannaamioqatigiit uparuaataat tusaaniarneqassasoq.
- Upernaap ingerlanerani Kalaallit Nunaat Savalimmiullu ataatsimeeqatigisaqattaartussaavagut, taama TV 2 sport-imut oqarpoq DIF-imi pisortaq Jesper Frigast Larsen.
Tamatuma kingorna timersornermi peqatigiiffiit kattuffiillu piumasaqaataasartut misissussavaat.
- Oqaluuserineqassaaq massakkut piumasaqaataasunit qaffasinnerusunik immikkut akuersissuteqartoqassanersoq, tassani pineqassallutik kalaallit savalimmiormiullu timersortartui, taama Jesper Frigast Larsen oqarpoq.