Kangilinnguani sakkutooqarfimmi timmisartut orsussaat 11.400 literi tammaaneqartoq suli nassaarineqanngilaq.
Sakkutuut ullaap tungaani tankinut atorneqanngitsunut pingasunut assaanertik naammassivaat, orsussarli taakkununnga pisimassangatinneqaraluartoq nassaarineqanngilaq.
-Neriuutigigaluarparput orsussaq tankiniissasoq tassaniinngilarli. Massakkut allamut ujaasilluta misililerparput, nassaarinissaalu tikillugu ujaasissaagut. Mingutsitsisoqarsimasinnaanera peqqutigalugu ujaasinerput ingerlatiinnassavarput, obertløjtnant Ole SparreVohn oqarpoq.
Mingutsitsisoqarnerani iliuuserineqartussat sakkutuut suli aallartinngilaat, orsussap sumiiffia nassaarineqaqqaarusummat.
-Qujanartumik timmisartup orsussaa sukkasuumik aalannguuttarnera peqqutigalugu mingutsitsivallaarneq ajorpoq, Ole SparreVohn nassuiaavoq.