Ingasattajaarlutik talerperliuniat amerliartorput
Danmarkimi ingasattajaarlutik talerpilliuniat amerliartorput. Profetip Muuamaap titartarneqarnerata kingunerisaanik amerliartulersut, politiit isertortumik paasiniaasartoqatigiivi isumaqarput.
- Danmarkimi ikinnerusussuteqartut aaqqissuigaangata soqutigisaminilluunniit saqqummersitsigaangata soqutiginnittut ilaasortanngorusullutilluunniit nalunaartartut amerliartornerisigut tamanna maluginikuuvarput, Naalagaaffiup isertortumik paasiniaasartoqatigiivisa pisortaat JyllandsPostenimut oqarpoq.
Talerpillit nittartagaatillit saqqummilaarneruleriartortut aamma taassuma nalunaarutigaa. Tamatumalu saniatigut aqqusinermi immikkuullarissuteqartut malunnartinniarlugit ingerlaaqatigiinnerit amerliartortut nalunaarutigineqarpoq.
- Februaarimi marsimilu talerpilliuniat arfineq-marloriarlutik ingerlaaqatigiipput, Danmarkimi isertortumik paasiniaasartoqatigiit pisortaat oqarpoq.
Ingerlaaqatigiinnik aaqqissuisut ilaat tassaapput Dansk Front aamma Stop Islamiseringen af Danmark.
