Helle Thorning sukasimaarpoq

Danmarkimi Socialdemokratit siulittaasuata Helle Thorning Schmidtip partiip siunissami pilersaarutai tamanut ullumi saqqummiuppai. Innuttaasut atugarissaarnerunissaat anguniarlugu suliniutissat pingaarnerpaatut Socialdemokratinit sulissutigineqassapput siulittaasullu Socialdemokratit naalakkersuisooqataalissagunik anguniagassaattut saqqummiussani taavai.

- Ilaqutariinnut inissiat akikinnerusut amerlanerit, meeqqerivinni inissat amerlanerit pisortallu suliffeqarfiutaanni napparsimanerit ikilisarneqassapput Socialdemokratit naalakkersuisooqataalissagaluarpata, Helle Thorning Schmidt taama oqarpoq imalu nangippoq:

- Naalakkersuisooqatigiit akileraarutit apparsarniarsaraat uagut innuttaasut atugarissaarnerunissaat sulissutigerusupparput, Helle Thorning Schmidt oqarpoq.

Socialdemokratit innuttaasut atugarissaarnerunissaat anguniarusuppaat akileraarutit nikisinnaagit, tamannalu partiinit allanit eqqarsarnartoqartinneqarpoq. Taamaakkaluartorli Socialdemokratit siulittaasussarsiormata Helle Thorning Schmidtimut unammillertuusup, Frank Jensenip, tamanna tapersersorusuppaa ima oqarluni:

- Socialdemokratit partiillu killilersuerusunngitsut immikkoorutaat taama erseqqitsigisoq amerlanernit taamaalilluni paasineqalissagunarpoq. Taamatut oqarnermini Helle Thorning Schmidtip Anders Fogh Rasmussenimut unammillersinnaanera taperserpaa.

- Helle Thorning Schmidtip pilersaarutit saqqummiunneqartut pimoorullugit anguniarunigit ilaasortat ikiliartorneri unitsilluarsinnaavai, Frank Jensen naggasiivoq.