Timmisartoq USA-p nakkutilliissutaa, inuttaqanngitsoq, Iran-ip killeqarfiinik alapernaarsuisinneqartilluni, Iranimiunit rakitsimik saassunneqarluni nakkartinneqarsimasoq, Iran-imi aviisit ilaannit Jumhuri Eslamimit allaaserineqarpoq.
Amerikamiut Iran-imik saassussinissamik siorasaarereernerata kingorna timmisartumik nakkartitsineq pivoq.
Amerikamiut ilungersorlutik Iran-ip atomip nukinganik sakkussiornera unitsinniarsarigaluarpaat, oqaloqatiginnittarnerillu kinguneqanngiinnalermata, USA-p Iran-i siorasaarpaa, ilaatigut Iran-ip saassunneqarnissaa piareersarneqartoq, tamanna aviisit ilaanni ippassaq suaarutigaat.
- USA-p taamatut saassussiniarluni siorasaarinera, Amerikamiut susinnaajunnaalersimanerannik takutitsiinnarpoq, Iran-ip nunanut allanut ministereqarfiata oqaaseqartittagaa, Hamid Reza Asefi, oqarpoq.