Avannaani qaleralittassat 2.500 tonsit naalakkersuisunit agguaanneqarnerani, Qaqortup kommunia qulaatiinnarneqartutut misigisimavoq, taamaammallu Qaqortup borgmesteria Simon Simonsen naalakkersuisut siulittaasuannut ammasumik allagaqarfigaa.
- Ukiarmili suleqatigisagut qaleralittassanik qinnuteqarsimasut ilisimavarput, maannakkullu paasivarput, qaleralittassat Nukiit A/S-p pissanngikkai, ippassaanili paasivarput qaleralittassat allanut tunniunneqartut, allaat aalisagartassanik tunineqartut aalisariutaateqanngillalluunniit. Aamma avannaani qaleralittassat tamakkerneqarneqarneq ajorput, taamaammat nutaamik nalileeqqittoqarnissaa neriuutigaarput, taamaattoqanngippalli ajuusaarnassaaq, Qaqortumi borgmesteri Simon Simonsen oqarpoq.
Qaqortumi suliffissaaleqisut ullumi 7 procentiupput.