Autistit angajoqqaavi isumalluarput
Austistit angajoqqaavi kiisami tusaaniarneqaleramik neriuutissaqalerput. Angajoqqaat katillutik qulit ukiorpassuarni puigugaasutut misigisimasut politikkikkut oqartussaq, Ilaqutariinnermut Naalakkersuisoq Aleqa Hammond sisamanngormat unnukkut ataatsimeeqatigaat.
Autismemik Asperges Syndromimilluunniit nappaatilimmik meeraqarluni angajoqqaatut aporfiit nalunaaquttap akunnerini marlunni saqqummiussorneqarput, imalu angajoqqaaq Inger Platou ulluinnarni atukkatik pillugit oqarpoq.
- Ikorfartortinik amigaateqartarnerit ajornartorsiutaasorujussuupput, aammalu meeqqanut taamaattunut fritidshjemmit tigusisinnaaneri killeqartarlutik. Autistinut immikkut ittumik paaqqinniffiusinnaasumik pilersisitsoqaraluarpat, angajoqqaanut oqilisaassineq annertoorujussuussagaluarpoq. Aamma Naalakkersuisut arlallit saaffigisarsimagaluarpagut, tamakkuli kinguneqartarsimanngillat. Kisianni maannakkut Aleqa Hammond-imut saaffiginninnerput isumalluarfigaarput, Inger Platou oqarpoq.
Aleqa Hammondimut allakkat pingasunngorpat apuunneqassapput, taassumalu kingorna autistit suliniarfigineqarnerat ingerlaqqissasoq angajoqqaaqatigiit neriupput.