Italiami qinersilerput

Italiami aqagu parlamentimut qinersisoqassaaq, inuillu 50 millionit qinersiartussaapput.

Qineqqusaartunut ilaapput, maannakkut præsidentiusoq Silvio Berlusconi aammalu præsidentiusimasoq Romano Prodi, taakkualu unammilaavissorput.

Qineqqusaarnerni inunnik ataasiakkaanik malersuinerit ingerlanneqartarput, inuillu isumasiorneqarnerini kikkut qinigaanerunissaat eqqoriarneqartalereerluni. DR-ip Italiamut aallartitaa Ole Sippel ima oqaluttuarpoq:

- Sapaatip-akunnera sioqqullugu inunnik isumasiuinerit Italiami inerteqqutaalersaraluartut oqaatigineqarpoq Berlusconip isumasiuinerit atorluartarsimagai. Qineqqusaarnermi illuatungiliuttut sakkortuumik Berlusconimit saassunneqartarput, taamatullu pisoqartarnera malunnarsereerpoq, sulimi Berlusconip siuaqqanera malunnarpoq, Ole Sippel oqarpoq.

- Romano Prodi qinerneqassagaluarpat, Italiami innuttaasut naatsorsuutigisinnaassavaat, Italiami aqutsineq Stalin-ip Lenin-ip Mao Tse Tsung-illu aqutsisarsimanerattut Italia aqunneqalissasoq, taama Berlusconi illuatungiliuttunik saassussisarnermini qinersisartut oqariartuuteqarfigisarpai.

Italiami qineqqusaartarnerni Berlusconip neriorsuutigisarsimavaa, Italiami akilileraartarnerni oqilisaassisoqassasoq, qinersisartullu tamanna upperissappassuk, aqagu qinersinermi Berlusconi ajugaasinnaavoq.