Hans Enoksen: Nammineq aningaasaateqalerutta inuiattut tatiginerulissaagut

07. april 2006 14:27

Nunatsinni nammineq 2008-mi aningaasaqalerutta aningaasat kalaalerpaluttunik assitalersugaassapput, kalaallisullu allagartaqassallutik. Pilersaarutit Naalagaaffiup Aningaaserivissuanit ukiup ataatsip missaani suliarineqareersimapput, naalakkersuisullu tamanna pillugu marlunngormat ataatsimeeqatigaat.

-Isumaqarpunga nammineq aningaasaateqalernerput annertuumik sunniuteqassasoq. Sumiluunniit angalalluni nunat tikikkaangatsigit aningaasaasa qanoq isikkoqarneri allallu misissoqqissaartarpavut. Taamaalilluta aamma nunarput nammineq aningaasaqalerpat avammut nittarsaassinnaanera aamma pitsaanerulissaaq, minnerunngitsumillu inuiattut tatiginerulernissatsinnut aamma annertuumik tunngaviussaaq, Hans Enoksen oqarpoq.

Hans Enoksen aamma isumaqarpoq, nammineq aningaasaqalerutta nammineerusussuseq suli annertunerulissasoq:

-Uani takuarput nunarput siumut ingerlasoq ingerlallualeriartortorlu. Qularnanngilaq aamma inuit eqqarsaatimikkut taanna tigulluassagaat, taamaalillunilu nunatsinni nammineerusussuseq suli annertunerulersillugu, Hans Enoksen oqarpoq.

Hvis du har fundet en fejl i artiklen, kan du skrive til os her.

Læs også