Nanortalimmi siunnersuisarfittaarput

Nanortalimmi aalisartut ajornartorsiutaasa nunarput tamakkerlugu politikerinut erseqqissaavigisarnerisa saniatigut, Nanortallip Kommunia aalisartunut inuussutissarsiutilinnullu allanut siunnersuisarfimmik ingerlatitsilerpoq.

Borgmester Kristine Raahauge oqarpoq, innuttaasut utaqqisaraat kommunip qanoq iliuuseqarnissaa, kisiannili iliuuserisinnaasatik killeqartut.

Royal Greenlandip Arctic Green Food-illu isumaqatigiinniarnerat kommunimi politikerit mianersuuttariaqarpaat akornusersussannginnamikku. Soorunami ajornartorsiutivut qaangerniarlugit, sapinngisarput tamaat politikerit killinniartarpagut, Kristine Raahauge oqarpoq.

-Tassa kommunip qanoq iliuuseqarnissaa killeqartorujussuuvoq. Kommuni inuussutissarsiummik suliffimmik ingerlatsisinnaanngilaq, tamanna namminersortut suliassaraat. Taama aallartitserusuttunut siunnersuisinnaanerluta pingaartinneruvarput.

Nanortalimmi inuussutissarsiuteqartunut Siunnersuisarfik allartippoq, maannamullu aalisartut piniartullu KNAPP-mi ilaasortat qaaqquneqaqqammerput isumasioqatigineqarlutik 50-llu missanniittut takkussimapput.

Siunnersuisarfiup pisortaa Kurt Pedersen oqarpoq, aalisartut ukiuni kingullerni aningaasanik isertitaminnik takutitassaqarsinnaasimanngitsut ullumikkullu inissisimanertik eqqartorsimagaat. Saqqummiussorneqartut tunngavigalugit Naalakkersuisut siulittaasuat Hans Enoksen, Aalisarnermut Naalakkersuisoq Finn Karlsen, Inuussutissarsiornermut Naalakkersuisoq Siverth K. Heilmann KNAPK-lu allaffigineqarsimapput, oqaloqatigiinnerit suliassanillu unittoorsimasunik aallartitseqqittoqarnissaa neriuutigalugu.