Isertuussanik Bush saqqummeeqqusisimasoq
USA-p præsidentiata George Buship USA-p Irakimut sorsulernissaa sioqqullugu, paasissutissat Irakimut tunngasut isertuussallu aviisersuarmut New York Timesimut saqqummiunneqarnissaat naalakkiutigisimagaa, vicepræsidentip Dich Cheneyp sulisuminut pisortarisimasaa Lewis Libby oqarsimanerarlugu, USA-mi eqqartuussivik Irakimut sorsunneq pillugu misissuisinneqartoq saqqummiussivoq.
Lewis Libby eqqartuussivimmi killisiorneqarluni oqarsimavoq præsidentip tulliata Dich Cheneyp peqqusimagaani, Irak pillugu paasissutissanik isertuussanik kiisalu præsidentip Iraki pillugu politikkianut isornartorsiuisoq Joseph Wilson pillugu, tusagassiuutinut saqqummiusseqqulluni.
USA-p Irakimut 2003-mi sorsulernera Irakip aseruerujussuarsinnaasunik sakkussiaateqarneranik tunngaveqartinneqarpoq.
Joseph Wilsonip præsidentimut 2003-mi isornartorsiuinermi saqqummiuppaa Iraki atomimik sakkussiarsualiornissaminut tunngavissaqarsimanngitsoq, tamannalu USA-mi isertortumik paasiniaasartoqarfiup CIA-p uppernarsarsinnaagaa.
Lewis Libby oqarpoq tusagassiuutinut taama saqqummiussineq inuup ataasiinnaap peqqusineratigut pisinnaasoq, inullu pineqartoq tassaasoq George Bush.
Lewis Libby Irakimut sorsunneq pillugu misissuinermut akornusersuisimasutut eqqunngitsumillu paasissutissiisimasutut ukiuni 30-ini parnaarussanngortinneqariaannaavoq.
