Nunatsinni immiaarartornerulersimavugut. Maqitsivimmi Nuuk Imermi siulersuisut nalunaarutigaat, 2004-mut sanilliullugu 5 procentimik siorna immiaarartornerusimasugut.
Literinngorlugu 300.000 literit missarluinnaanik immiaarartornerulersimavugut, immiaaqqat katillugu 7 millioni literi siorna imerneqarsimallutik.
Tamanna isumaqarpoq, nunatsinni innuttaasut tamarluinnarmik ukiumut 123 literinik immiaarartorsimasut.
Immiaaqqat akiisa 2004-mi appartinneqarnerisa kingorna tunisat ikiliartornerat unissimavoq, immiaaqqanillu tunisat taamaalillutik amerliartoqqilersimallutik.
Sodavandinik tunisat akerlianik ukiup siulianut naleqqiullugu 2 procentimik ikinnerulersimapput. Nuuk Imermiit tunisartakkat tamaasa agguaqatigiissillugit 2 procentimik 2004-mut naleqqiullugu siorna amerlanerulersimapput.
Puiaasat imerneqareeraangamik amerlanersai utertinneqartarsimapput, 1,4 procentii taamaallaat utertinneqanngitsoorsimallutik.
2005-mi naatsorsuutit akileraarutit peereerlugit 19,8 millioni koruuninik sinneqartoorsimasut, Nuuk Imermi siulersuisut siulittaasuat Ove Karl Berthelsen tusagassiutinut nalunaaruteqarpoq.