SIK -ip Polenimiut akuersissuteqaratik sulisut politiinut unnerluutigai

Poleniumiunik nunatsinni sulisinnaanermut akuerineqarnikuunngitsunik suliffeqarfiup Greenland Ground Construktion-ip sulisitsisimaneranut atatillugu Nuup kommunea pisussaaffimminik sumiginnaasimavoq, taama isummernini SIK-p siulittaasuata Jess G. Berthelsen-ip aalajangisiusimavaa. Illuatungeriit ippassaq ataatsimeeqatigiittut Namminersornerullutik Oqartussanik aqagu ataatsimeeqatiginnissapput. Polenemiut akuersissuteqaratik sulinerat politiinut unnerluutigisimagitsik Jess G. Berthelsen oqarpoq:

-S.I.K- suli isumaqarpoq nunami sulisinnaanerminut akuersissummik peqaratik sulinerat unioqqutitsinerusoq, taamaattumik ippassaq taanna aallavigalugu politiinut unnerluutigaavut, Jess G. Berthelsen oqarpoq.

Jess G. Berhelsen-ip amma aalajangiusimavaa Nuup Kommunea pisumi pisussaaffimminik sumiginnaasimasoq.

- Isumaqarpugut kommuni pisussaaffeqarsimasoq qulakkiissallugu sulilertinnagit sulisinnaanermut akuersissummik peqarnissaat, tamannalu ippasaq kommunilu oqaloqatigiissutigaarput, paasinarmammi Namminersornerullutik Oqartussaninngaanniit paasissutissanik assigiinngitsunik tunineqarsimalluta, tamaattumillu aqagu Namminersornerullutik Oqartussaninngaanniit peqateqarluta naapeqqinnissarput isumaqatigiissutigaarput, Jess G. Berthelsen oqarpoq.

Jess G. Berthelsen aamma oqarpoq inatsisilerituuminniit ilisimatinneqarlutk S.I.K-ip suleriaasiat eqqortuusoq, aammalu qangalili nunaqavissut sulisitsisut kattuffiat NUSUKA peqatigalugu sukaterisoqarnissaa anguniarsimallugu, aammalu upernaaru ataatsimiinnissaminni neriulluni Namminersornerullutik Oqartussaniit tusaaniarneqarnissartik neriuutigalugu.

Jess G. Berthelsen oqarpoq Borgmesterip SIK-llu nunaqavissut sulisorineqarnissaat soqutigisarigamikku ataatsimoorussamik politikkeqarnissaq pingaaruteqartoq:

-Borgmesterip soqutigisassaa uagullu soqutigisarput tassaavoq nunaqavissut amerlanerpaanik sulisorineqarnissaat, taamaattumik pinngitsoorsinnanngilarput Nuup Kommunealu tamanna anguniarlugu suleqatigiinnissarput.

- Pingitsooratali sukaterisoqarnissa anguniartariaqarparput, Polenimiunimmi imaaliallannarlutik sulisorineqarsinnaappata sulisitsisup kiap soqutigisavaa nunaqavissunik ilinniartoqarnissaq, Jess G. Berthelsen naggasiivoq.

Jess G. Berhtelsen aamma oqarpoq nalunaarusiartik sulisitsisup Polenimiunik akilernerluisimaneranik aamma imaqartoq.