Irlandimiut tuluillu eqqisseqatigiinnissaat anguniarneqarpoq
Irlandip avannarpasissuani eqqissineqaannarnissaa anguniarlugu Irlandimiut Tuluillu siuttui isumaqatigiinnialerunik ilungersussagunaqaat.
Irlandip avannarpasissuani katuullit naaggaartullu akersuuteqqilinnginnissaat anguniarlugu Irlandip ministeriunerata Bertie Ahernip Tuluillu ministeriunerata Tony Blairip aqqutissaasinnaasut tamaasa atorlugit anguniarpaat.
Irlandip avannarpasissormiui nunamik aqunneqarneranni oqaasissaqaqataanissaannik Tony Blair neriorsuuteqarpoq, tusaajumanngippatali Irlandip avannarpasissua Londonimiit aqunneqalissasoq sioorasaarutigalugu.
Eqqisseqatigiiginnarnissamik isumaqatigiinniarnissat aallartinnerlioqaat, ippassaanimi Irlandimiu tulunnut kilitsissiaasimasoq toqutaavoq, katuullit naaggaartullu akisussaaffigerusunngisaat.
-"Kilitsissiaasimasumik toqutsinermi pisuutitseqattaarnerit Irlandip avannarpasissuani eqqissineqaannarnissaanik isumaqatigiinniarnernut akornutaassanngilluinnarpoq” tuluit ministeriunerat Tony Blair tusagassiortunut nalunaaruteqarpoq.
Piumasarineqarpoq novembarinngortinnagu Irlandip avannarpasissuani akerleriit naaggaartut, katuullillu Sinn Feinimi ilaasortat tamarmik sinniisoqalernissaat, taamaanngippat aqutsineq Tuluit ingerlatilissammassuk.