KNAPK-p Royal Greenlandillu raajat akii pillugit isumaqatigiinnginneranni naalakkersuisut maanna akulerupput.
KNAPK-p Royal Greenlandillu raajanut akigitinniagaat 8,1 millioni koruunik avissaaruteqartut, ippassaq naalakkersuisunut paasissutissiissutigineqarput.
Pisoq naalakkersuisuni ullumi aqaguluunniit eqqartorneqassaaq. Maannalu apeqqutaaginnalerpoq naalakkersuisut 8,1 millioni koruunit amigaataasut tapiissutitut raajarnianut tunniutissaneraat, aningaasallu suminngaanniit aaneqassanersut.
KNAPK-p siulittaasuata Peter Olsen-ip uggorivaa naalakkersuisut akerleriinnermi akuleruttariaqalernerat, kissaatiginerugaluarpaami Royal Greenlandip piumasatik tunniussinnaassagaat.
Raajarniat ullut 13-issaat maanna uninngapput, Royal Greenlandillu suliffissuinut tunisineq taamaalilluni aamma uninngavoq.