Meeqqat naamaartarnerat malunnarseqqippoq
Upernariartornerani ukiariartorneranilu meeqqat inuusuttuaqqallu naamaarnerulersartut pinaveersaartitsisuniit ilisimaneqarpoq. Tamannalu angajoqqaaniit eqqumaffigineqaqqullugu Nuummi pinaveersaartitsisut angajoqqaanut pisiniarfinnullu allagaqarput.
- Piffissaq kingulleq aasit malunniutilerami meeqqat assigiinngitsuni inissillutik naamaarniutinik sammisaqartaleqqissimasut. Taanna iluamik soorunami paasiniariarlutigu uppernarsigatsigu annertusivallaartinnagu angajoqqaat atuartuutillit aammalu pisiniarfiutillit assigiinngitsunik pisiassanik peqatartut taakkua ilisimatitsissummik allaffigisimavagut. Ukiut affaakkaarlugit taama iliortarpugut, kisianni tassa naamaartarneq tammartarlunilu saqqummeqqittarami maannakkut takussutissaqaratta mianersoqqusisariaqartutut inissisimalerluta taamaattumik angajoqqaanut allagaqarsimavugut soorlu mianersortumik misissuilaaqqullugit malunnaatinik assigiinngitsunik takusaqarunik, imaluunniit qitornartik pissusissarinngisaminik iliuuseqartalersimappat taava maluginialaaqqullugu. Taamatuttaaq kaammattorpagut uagut allaffitsinnut paasiniaasinnaasut imaluunniit immikkut paasissutissanik atuarfimmut agguaannikuusatsinnut saaffiginnillutik pisinnaasut. Taava pisiniarfiutilinnut ilisimatitsissut nassiussarput imaqarpoq; soorlu meeqqat 18-iliisimanngitsut ikittaatinik allanillu inersimasup pisiassarisaanik pisitinneqartassanngitsut, peqqutigalugu nalusaratsigu qanorpiaq taakkua atorniarneraat aammalu eqqarsaatigerpiarneqassanani suut atortut qanoq ilillugit aalakoorniutigineqarsinnaanerat, Lene Dalentoft oqarpoq.
- Sooq taamaaliortariaqarsimavisi?
- Tassa peqqutigalugu naamaarneq ulorianartorujorujussuugami meeqqamut akornutaarujussuarsinnaavoq eqqarsartaatsimigut qaratsamigut killilimmik piginnaaneqassutigilersinnaallugu aalat arrortinneqarsinnaanngitsunik akullit akornusiisarmata annertoorujussuarmik. Aamma tamakkua atorneqartartut ikuallajasorujussuugamik taavalu meeqqat toqqorsimallutik taamatut naamaarfimminni aamma ikuallatitsisinnaanerat qaartoortitsisinnaanerallu ulorianarluinnarmat, taama oqarpoq, Nuummi SSPK-mi pinaveersaartitsinermut siunnersorti Line Dalentoft.