Sharon itinngikkuni tunuartitaasussanngorpoq
Israelip ministeriunera Ariel Sharon siniinnaleqqasoq sapaatip-akunnerata tulliani naalakkersuisunit suleqqissinnaanngitsutut nalilerniarneqartoq, aviisimi Yediot Aharnotimi atuarneqarsinnaavoq.
Israelip ministeriunera Ariel Sharon januaarip sisamaani aanaartoorluni sulisinnaajunnaarpoq, siniinnalerlunilu. Paarlatsigisaa Ehud Ohlmert sapaatip-akunnera kingulleq inatsisartunut qinersinermi ajugaasoq, sapaatiuppat naalakkersuisunngortussat ataatsimiinneranni ministeriunertut ivertinneqassaaq, apriilillu 14-iani, Ariel Sharonip ulluni 100-ni sulisinnaasimannginnera eqqorlugu ministeriunertut
suaarutigineqassalluni. Israelimi inatsisit tunngavigalugit Ariel Sharon iteriasaassanngippat Ehud Ohlmert ministeriuninngortinneqassaaq; Ariel Sharonilli iternissaa ilimagineqanngilaq, Ohlmertillu partiit suleqatissani isumaqatigiinniaqatigilersussaassaavai, amerlanerussuteqassagunilu inatsisartuni inissat 62-it qulakkeeqqaartariaqassavai.
Pingasunngorpat qinersinerup inernerata kisitsisitai misissoqqissaarlugit Israelip præsidentiata Moshe Katsavip Ehud Ohlmert qinnuigissagunaannaavaa naalakkersuisunngortitseqqullugu.