Iranimi nuna sajorujussuarpoq

Iran-ip kippasissortaani nuna ullumi sajorujussuarpoq. Naatsorsuinerit takutippaat inuit ikinnerpaamik 70-it toqutaasimasut, inuillu 1265-it ikiligaasimasut. Nunap sajunnera Iranip nalunaaqutaa malillugu tallimanut tanneq qulit pivoq illoqarfillu Lorestan eqqorneqarpoq.

Nunap sajunnera richterip uuttuutaa malillugu 6-iuvoq, nunaqarfeeqqallu 330-it sajunnermik eqqorneqarput.

-Inuit qassit toqusimanersut aserorneqartullu qanoq annertutiginersut unnugu aatsaat paasisinnaassavarput, Lorestan-imi guvernør-i, Mohammad Reza Mohseni Sani Iranip TV-qarfianut oqarpoq.

Inuit annassimasut ilaat qarmakunik anillatsinneqarsimapput, toqusullu suli amerlanerunissaat ilimagineqartoq, sajuffikumi annaassiniattut nalunaaruteqarput.

Oqarasuaatikkut attaveqaatit, innaallagiaqarneq gas-ilu atorneqarsinnaanngitsut, pisortani atorfillit oqaatigaat.

2003-mi Teheran-ip kujammut kangimut 1000 kilometerisut ungasitsigisortaani Bam-imi, nuna sajorujussuarmat inuit 31.000-it ajunaarput.