Nunat avannaamioqatigiit ilinniartuisa ulluat Christiansborgimi ullumi ingerlanneqarpoq.
Radioaviisip aallartitaa Rosa Thorsen Christiansborgimiit oqarpoq ataatsimiinneq ajunngitsumik ingerlasimasoq. Statsminister Anders Fogh Rasmussen ilinniartut najuuttut 150-it missaanniittut oqalugiarfigereeramigit ilinniartut ilaat tikillugit oqaloqatigisimavai, ilinniartullu amerlanerit namminiilivinnissamut suliniutit qaqugu ingerlateqqinneqassanersut statsministerimut apeqqutigisimavaat. Statsministerip namminiilivinnissaq pillugu ataatsimiititaliap innersuussutai 2007-mi naammassineqartussat takoqqaarlugit aatsaat isummerumasimavoq.
Dansk Folkepartiip nunarput pillugu oqaaseqartartua Søren Espersen oqarpoq, nunarput ullumikkut namminiilivinnissaminut piareersimanngilluinnartoq, tusarnaartunik kissaallatsitseqisumik. Lars-Emil Johansen-ip akillugu ima oqarpoq:
-Søren Espersen, nunarput qanoq ilisimatigaajuk? Nunasiaatilittut pissusilersorunnaarniarit.
Ilinniartut Christiansborgimi katersuunnertik malunnartinniarlugu namminneq aaqqissuussaminnik nuannatsitsiniarput.