Inuppassuit sukkornermik, aap naqitsineranik qaffasippallaartumik imaluunniit aakkut orsoqarpallaarnermik nappaateqarlutik nalusarpaat, tamanna pillugu misissuisoqassasoq,
issittormiut peqqissusaannik ilisimatusarsimasoq Peter Bjerregaard ilisimatitsivoq.
Nuummi innuttaasut 1111-it ulluni makkunani allagarsiortorput innuttaasut peqqissusaannik misissuinissamut peqataaqqullugit kajumissaarummik.
Peqqissuseq pillugu misissuinersuaq, misissuinerup 1993-imi ingerlanneqartup nanginneraa, misissuinerlu Nunatsinni Nunavummi Alaskamilu ingerlanneqassaaq.
Nunatsinni Nuuk sineriammilu illoqarfiit nunaqarfiillu allat aamma misissuiffigineqassapput. Misissuinissamik aaqqissuisuupput Naalagaaffiup peqqissutsimik ilisimatusarfia Peqqissumullu pisortaqarfik.