Ilisimatuut Universitetimi East Ankleameersut aalisakkap iginnerinik assigiinngitsunik 83-nik misissuisimapput. Misissugaalli malunniuteqanngitsut erseqqissaassutigineqarpoq, tassa imaalluni aalisakkat naasulluunniit orsorigaluarpagit kimeqanngitsuunerat erseqqissaassutigineqarluni, taama ilisimatusartut aviisiat allaaserinnippoq.
Uummallunnermut nakorsaq Lars Olsen aperaarput ilumoornersoq aalisakkap orsuata iluaqutaanerarneqartarnera.
- Ilumoorpoq uppernarsaatissaqanngikkipput aalisakkat orsuisa uummallunnermut iluaqutaasinnaanerat, Lars Olsen akivoq.
Taanna DR-ip tusagassiortuanit aperineqaqqippoq iluaqutaanerarneqartaraluartut uffa immaqa ajoqutaaginnarsinnaasulluunniit.
- Taamatut oqarnissara mianersuuttariaqarpara, oqartariaqarpungali ilisimatusarnikkut aalisakkat orsuisa iluaqutaanerarneqartarnerat uppernarsaatissaqartinngikkutsigu iluaqutaasutut oqaatigisinnaanngikkigut.
Nakorsaq Lars Olsen aperineqaqqippoq, taamaakkaluartoq aalisakkat orsuinik inuit nerisarnissaannik sooq kaammattuisoqartarnersoq.
- Tamatumunngami tunngavissaqarluarpugut tassami aalisakkat assigiinngitsorpassuartigut misissugaasarsimapput, ilisimaneqarporlu aalisakkat uummallunnermut iluaqutaasarnerat, taamaattuminguna ullormut 300 grammit missaanni nerineqartarnissaat innersuussutigineqartartut.
Nakorsarli apersorneqartoq erseqqissaateqarpoq taamatut innersuussisariaqartarlutik qanorpiaq aalisakkat uummallunnermut iluaqutaasarnerat iluamik paasineqarsimanngimmat.
- Aalisagaq tamarmi peqqinnartorujussuuvoq, aalisakkammi orsua kisimi aalisagaanngilaq, nakorsaq Lars Olsen oqarpoq.
Taassuma sanilliuppai naatitat aamma taamatulli peqqinnarnerarlugit innersuussutigineqartartut.