Nanortalimmi IA-p Siumumik suleqateqarnertik kipitippaat isumaqatigiissummik avaqqutaareqattaarmata

Nanortallip kommuniani Inuit Ataqatigiit Siumukkunnik suleqateqarnertik ippassaq kipitippaat. Siumukkormiut suleqatigiinnerup sinaakkutaanik saneqqutaaralutik suliaqartarnerat, kiisalu Kultureqarnermut Ilinniartitaanermullu ataatsimiititaliami siulittaasuuffeqarnermik Siumukkut unitsitsisimanerat Siumukkunnik suleqateqarumajunnaarnermik Inuit Ataqatigiinnit peqquteqartinneqarpoq.

-Pisut takutippaat suleqatigiinnermik isumaqatigiissut saneqqutaarneqaqattaartoq. Una aallavigaarput Kultureqarnermut Ilinniartitaanermullu ataatsimiititaliami siulittaasuutitarput ataatsimiigiaraluarluni paasimmagu, Siumukkut siulittaasuuffik tiguniaraat, ulloq mannalu tikillugu uppernarsaammik takussutissamik suli takusaqanngilagut, Aqqaluk Petrussen Nanortalimmi Inuit Ataqatigiinni siulittaasoq oqarpoq. Siumukkunnik suleqateqarumajunnaarneq aamma peqquteqartinneqarpoq, Inuit Ataqatigiinnit ernummatigineqarmat ataatsimiititaliani siulittaasuuffigineqartup aappaani, tassa Isumaginninnermut Ataatsimiititaliami siulittaasuuffik aamma atorunnaarsinneqariaannaaqinammat. Taamaakkaluartoq Inuit Ataqatigiit innuttaasut qanimut suleqatigalugit qinigaaffimmi suliatik ingerlatiinnarniarlugit oqaatigaat. Suleqatigiinnermilli kipititsineq aamma allamik peqquteqarpoq:

-Innuttaasunik ataatsimiisitsinermi Siumukkormiut kommunalbestyrelsemut ilaasortaatitai innuttaasunut oqariartuuteqarput, Inuit Ataqatigiikkormiut eqqissiviitsuusoq, tamannalu pinngitsoorani kinguneqartinneqartariaqartoq isumaqatigiissutigineqarpoq, Aqqaluk Petrussen oqarpoq.

Borgmesteri Kristine Raahauge Siumumilu ilaasortat pisumut oqaaseqarusunngillat.