Aviisimi AG-mi aningaasanik peqquserluuteqartoqarsimanera aviisip politiinut sisamanngormat misissugassanngortippaa.
Aaqqissuisoq Laila Ramlau-Hansen AG-mi aningaasanik atornerluisoqarsimanera pillugu annertunerusumik oqaaseqarumanngikkallarpoq, erseqqissaatigaluguli pisumut atatillugu sulisoq ataaseq sisamanngormat suliunnaarsitaareersoq.
Nuummi politeeqarfiup pisortaata Bent Heiselbergip uppernarsarpaa Atuagagdliutit-nit unnerluussummik tigusaqarsimallutik, maannalu suliaq paasiniarneqartoq.
Aviisimi aaqqissuisup politiilluunniit oqaatigerusunngilaat aningaasat pineqartut qanoq amerlatiginersut.