Napparsimasut paaqqutarisariallit napparsimavinniitinneqarnerinut Peqqissutsimut pisortaqarfiup kommunit akiliutaannik qaffaanera, kommuneqarfiit Kattuffiata KANUKOKA-p aamma Peqqissutsimut Naalakkersuisup ulloqeqqata siuninnguagut ataatsimiissutigaat.
-Paasivarput malittarisassat assigiinngitsumik paasisimallutigit, Peqqissutsimut naalakkersuisoq Asii Chemnitz Narup oqarpoq.
Akit nutaat napparsimasut paaqqutarisariallit napparsimmavimmiitinnerannut tunngassutillit atuutilernissaat sapaatip-akunnerinnaaneq sioqqutsilluni nalunaarutigineqarnerat KANUKOKA-p siulittaasuata uparuariarlugu nutaamik isumaqatigiissusiortoqartariaqartoq siunnersuutigaa.
Pisortaqarfimmilli itigartinneqaramik, KANUKOKA naalakkersuisut siulittaasuannut Hans Enoksenimut sapaatip-akunnera kingulleq sakkortuumik ammasumillu allagaqarpoq. Kinguneraalu ullumi ataatsimiinneq paaseqatigiiffiusoq pilersitsiviusorlu. Ataatsimiititaliaq suligasuartussaq KANUKOKA-p Peqqinnissamullu Pisortaqarfiup sulisuinik inuttaqartoq pilersinneqarpoq, suliap qanoq ingerlariaqqinnissaanik ullut qulit qaangiutsinnagit siunnersuuteqartussaq.