Amigartoornissaq Demokraatit akuerinngilaat
Aningaasanut inatsisissap aappassaaneerneqarnerani inatsisartuni amerlanerussuteqartunit amigartoorfiusussatut akuerineqarnera, Demokraatinit akueriumaneqarani ualeq inatsisartuni oqallittoqangaatsiarpoq.
Demokraatit siulittaasuat Per Berthelsen isumaqarpoq, sipaarniartoqarluaraluarpat aningaasanut inatsisissaq amigartoorfiussanngikkaluartoq.
- Naatsorsuutigilluinnarsimavarput taamatut akerlilersorneqarnissarput, tassami nalunngilarput naalakkersuisooqatigiit ukua isasooqqajaasorujussuusunaasiit. Taamaattumillu aamma tamarmik nalunngilaat aningaasanut inatsisissaq taakku suleqatigiit akunnerminni kissaaterpassuarnik imaqartunik oqallinnissamik tunngaveqarfigisaat taanna isumaqatigiissutaassanngippat taava suleqatigiinneq kipisooriaannaasussaasoq. Taamaattumik tungitsinninngaanniit tupaallaatiginngilarput utoqqatsissutissarpassuarnik aammalu akerlilersuuterpassuarnik itisilerneqanngitsunik milloorneqaratta, kisianni tassa nalunngilarput uagullu akisussaaffigalugu aamma inuiaqatigiit illersorneqarsinnaasumik aningaasanut inatsiseqarlutik ingerlanissaat taanna tassa angujumallugu kaammattorneqarnerput tunngavigalugu siunnersuuteqarpugut oqallisissanik, imaanngitsoq suut tamaasa anguniarniarsarissagigut nalunngilarpummi amerlanerussuteqartut taanna aalajangertussaagaat, Per Berthelsen oqarpoq.
- Jens Lars Fleischer Siumup oqaaseqartartorivaatsit, Demokraatillu sipaaruteqarniarlutik siunnersuuteqarput. Taakku sipaarutiginiagaat qanoq isumaqarfigivisigit?
- Soorlu oqaluttarfimmi oqaatigereeripput Demokraatit sipaarutissatut suliarisimasaat Siumuminngaanniit akuersaarsimanngilagut taamaattumik allaanerusumik oqaaseqarsinnaanngilanga taakku saqqummiunneqartut tamaasa akuersaanngilagut siumuminngaanniit, akivoq.
- Sooruna?
- Isumaqaratta inuiaqatigiinni suliniarnermi aamma aningaasatigut qanoq pilersaarusiornermi ilaatigut allatut ajornartumik amigartooruteqarluni suliaqarsinnaaneq periarfissaavoq. Paarlattuanik pilersaarutaanngitsumik soorunami amigartooruteqarneq taanna pitsaasuunngilaq uanili pilersaarusiugaasumik ukiuni tulliuttuni marlunni missingersuutini amigartooruteqarluni taava ukiuni tulliuttuni aamma sinneqartooruteqartussanngorlugu pilersaarusiaq taanna tunngavigalugu siumuminngaanniit naalakkersuisut ukiuni tulliuttuni marlunni amigartooruteqarnissaat akuersaarparput, kisiannili soorunami aamma sinneqartooruteqarnissaq taanna uagut peqataaffigerusukkatsigu ukiuni tulliuttuni, Siumumiit oqaaseqartinneqartoq Jens Lars Fleischer oqarpoq.
Demokraatit siulittaasuat Per Berthelsen aamma oqarpoq aappaagumut aningaasanut inatsisissaq amigartoorfiusussatut isikkoqalereermat, allaat maannakkumiit amigartoorutip marloriaataa angullugu amigartoorutit amerlassuseqalersinnaasut.
