Inatsisartuni kukkunersiuinermut ataatsimiisitaliaq Peqqissutsimut ilaqutariinnermullu pisortaqarfik uparuarpaat, ilaatigut missingersuusiornermut inatsimmik unioqqutitsisimasutut, aningaasanillu 13 million koruuninik atuivallaarsimasutut.
2004-mut aningaasaliissutissatut siunnersuutit piviusorsiunngitsut ilaqutariinnermut pisortarfimminngaanniit siunnersuutigineqarsimasut,
Inatsisartut kukkunersiuinermut ataatsimiisitaliaani siulittaasoq Kristian Jeremiassen oqarpoq:
- Naalakkersuisup siusinnerusukkut ilisimasimavaa, aningaasaliissutit piviusorsiortuunngitsut. Uparuaanitsinnut pissutigivarput, 2003-mi ilisimasaqareeraluarlutik inatsisartunut ilisimatitsisimannginnerat assut isornartoqartoq, Kristian Jeremiassen oqarpoq nangillunilu: - Ilassutissatut aningaasaliissutinik siusinnerusukkut qinnuteqartoqarsimasinnaagaluarpoq, taamaaliortoqarsimanngilarli, tamannalu naammaginanngilluinnartutut kukkunersiuinermi ataatsimiisitaliami nalilerparput. Aatsaammi 2004-p ukiaani qinnuteqartoqarsimavoq. Missingersuusiortarnermut inatsit malinneqarsimanngilaq. Aningaasaliissuteqarnissamut sioqqutsisumik akuersisoqareertinnagu aningaasaliissuteqartoqaranilu, aningaasanik atuisoqarsinnaanngilaq. Killiliussat iluani taamaallaat sulisoqarsinnaavoq. 2004-mi aningaasanik aqutsisoqarsimanera isornartoqangaatsiarpoq.
Inatsisartut kukkunersiuinermut ataatsimiisitaliaani siulittaasoq Kristian Jeremiassen Atassumminngaanneersoq taama oqarpoq.