Qeerlutuut nappaatillit Danmarkimi
Skrevet af Najaaraq Egede
Danmarkimi inuussutissanik misissuisoqarfiup timmissat nappaataat H5 qeerlutuuni qulingiluani nassaaraat. Qeerlutuut toqungasut Fynip kujatinnguani qeqertami Ærømi siumorneqarsimasut, inuussutissaqarnermut aqutsisoqarfiup nalunaarutigaa.
Sulili qulakkiivillugu paasineqanngilaq qeerlutuut nappaatigisimasaat tassaanersoq ulorianaqisoq H5N1.
H5N1 tigutsisillit ilaanni musvågemi Danmarkip ilaani Svinø Strandimi sapaatip-akunnera matuma aallartilaarnerani paasineqarpoq.
Ærøskøbingimi nuannaariutaatillit talittarfianni qeerlutuut toqungasut qulingiluat nassaarineqarfiat eqqaalu maanna pallitsaaliorneqarlunilu nakkutigineqalerpoq.