Milosevic inunngorfimmini ilisaassaaq
Serbiami naalagarsuusimasoq Slobodan Milosevic inuulluaqquniarlugu Serbiami illoqarfiit pingaarnersaanni Beogradimi inuit 50.000-it ullumi katersuupput.
Milosevic-imik naggammik inuulluaqqusiartorlutik Serbiami nunaminnik ingasattajaarlutik pingaartitsiniartut nationalistit amerlasoorsuanngorlutik – nunamit tamarmit aggiasimapput, naak nunat tamat Milosevicip sorsunnermi pinerluuteqarsimasutut unnerluunneqarnera pillugu assuarleraluartut.
Milosevicip illerfia ammasoq Serbiami inatsisartut illorsuata saavaniitinneqartoq inuppassuit siuleriiaarlutik saneqquajuarpaat.
Illerfimmik takuniaasut sisamanngormat tallimanngormallu 70.000-iusimasut, tyskit aviisiat ullormut saqqummersartoq Die Welt allappoq.
Milosevic illoqarfimmi inunngorfimmini Pozerevac-imi ilisaassaaq, ilaquttaminit naalagaaffilluunniit sinnerlugu ataqqinniniartunit najuuffigineqarani. Milosevicip nulia erneralu Serbiamiinngillat, nunagisaminnit qimarngugamik. Milosevic illumi naatsiiviani Beogradimit 70 kilometerinik kujasinnerusumiittumi ilineqassaaq.