Atlantikup avannaani miluumasut imarmiut pillugit kommissionip, NAMMCO-p, ulluni marlunni Islandip illoqarfiisa ilaanni Selfossimi ataatsimiinnerani nunatsinni qilalukkanik qaqortanik qernertanillu piniartarneq ernummatigineqarpoq.
Nunatsinni qilalukkat piujuaannartitsinissaq tunngavigalugu piniartoqarneq ajormat qilalukkat nungukkiartulersinnaasut NAMMCO-mit ernummatigineqarpoq.
Nunatsinni qilalugarniartarneq suli NAMMCO-mit nakkutigineqassaaq. Miluumasut imarmiut pillugit kommissionip 2006-ip sinnerani Norgemiut kalaallillu qilalugarniartarnerat nakkutiginiarlugu aalajangerpoq.
NAMMCO novembarip qaammataani Københavnimi isumasioqatigiissitsilerpat immikkut ilisimasallit piniartullu peqataatillugit piniariaatsit sukumiinerusumik sammineqassapput.