Pinngortitaleriffik qilalukkanik kisitsilerpoq
Pinngortitaleriffik nunatta kitaata imartaani qaammatip matuma qiteqqunneraniit qilalukkanik aavernillu timmisartoq atorlugu kisitsilerpoq.
Kisitsinerit avannaaniit Qeqertarsuup avannaaniittumiit Qeqertarsuatsiaaniit, kujammut Maniitsoq tikingajallugu, kippasissuserlu 56 grader avammut tikittarlugu ingerlanneqassapput.
Piniartut kitaaniittut marsimi kisitsisarnerit tutsuiginartinneq ajorpaat, isumaqaramik taamaalinerani sikuuallaartarnera sikuuniarpallaartarneralu peqqutaalluni qilalukkat sikussap ataaniikkajuttarnerisa kingunerisaanik timmisartumiit kisikkuminaattarmata, qilalukkallu taamatut anersaartortut kisitsinernit naatsorsuusiornermi ilanngunneqanngitsoorneqartarnissaat piniartut aarlerissutigisarlugu.
Taamaammat Pinngortitaleriffiup kisitsinissanut tunngatillugu piniartut allannguutissanik siunnersuuteqarsinnaanerat tusarniarlugu qaammatip matuma aallartinnerani ataatsimeeqateqatigineqarput.
Ataatsimiinnermi kisitsinissanut tunngatillugu pilersaarutit kisitsisarnernullu tunngassuteqartut tunuliaqutit nassuiaatigineqarlutik.
Kingullermik iluatsittumik qilalukkanik kisitsisoqarpoq 1999-mi, 2004-mi kisitsinerigaluaq silap ajoqattaarneranik peqquteqartumik unitsiinnarneqarmat.
Qilalukkat simiiffinni pineqartuni 1981-imiit maannamut arfineq-pingasoriarluni kisinneqartarnikuupput.
