Slobodan Milosevic Rusland-imi ilisaassagunarpoq. Milosevic-ip timaa ullumi ilaqutaanut tunniunneqassaaq, Haag-imi parnaarussivimmi timaa toqungasoq nassaarineqareersorlu misissuinerit takutimmassuk uummamminik unittoorluni toqquteqarsimasoq.
Ullut marluk qaangiuppata aatsaat paasineqassaaq uummamminik unittoornera toqunartutorsimanermik peqquteqarsimanersoq.
Serbiami præsidenti Boris Tadic ippassaq oqarpoq Slobodan Milosevic ataqqinartutut ilisaassanngitsoq. Tadic-ip aamma erseqqissaatigaa Milosevic-ip uillarnera Mira Markovic uini iliartorlugu Serbiamut iseqqusaanavianngitsoq.
Taamaammallu ilimagineqanngilaq Milosevic nunamini ilisaanissaa, uillarnera erneralu Serbiamut iserniaraluarunik ingerlaannaq parnaarussaasussaagamik. Taakku marluullutik nunat assigiinngitsut akornanni aamma parnaarunneqarsinnaallutik tigusaasinnaatitaapput.