Jugoslaviaasimasumi kisermaassilluni naalakkersuisuusimasoq Slobodan Milosovic 64-inik ukioqarluni toquvoq. Milosivic Haag-imi parnaarussaaqqaffimmini toqungasoq ullaaq siumorneqarpoq. Peqqinngissutigisaminik toqquteqarsimanissaa ilimagineqartoq Naalagaaffiit Peqatigiit sorsunnermi pinerluuteqarsimasunut Haag-imi eqqartuussiviat nalunaarpoq:
- Ajuusaarnaraluaqaaq pinerluutigisimasani pillugit akisussaatinneqanngitsoormat, Serbiap nunanut allanut ministeria Vuc Draskovic Milosivicip toqunerani taama oqaaseqarpoq.
Milosevic Jugoslaviaasimasumi 1990-kkunni sorsunnerup, inuit 200.000-it inuunerannik naleqartup kingorna, inuiannik nungusaaniarsimasutut unnerluutigisaavoq, Haag-imilu eqqartussivimmut suliassanngortinneqarpoq eqqartuussutillu inernissaata tungaanut parnaarussaalluni. Eqqartuussinerli inerneqariangitsoq Milosivic toquvoq.
Danmarkimi nunanut allanut ministeriusimasup Uffe Elleman Jensenip Milosivic præsidentiunerata nalaani arlaleriarluni naapittarsimavaa. Sorsunnerup nalaani 1993-imi Milosivicimik naapitsinini Elleman Jensenip oqaluttuaraa:
- Sivisuumik oqaloqatigiippugut, oqaloqatigiinnitsinilu maluginiarpara tatigisassaanngitsuusoq, sorsunnermi pisut tamatta ilisimalluaraluarigut, isikkuni allanngortinngivillugu salluffigaanga, taamaammat naapitsinera nuannerpallaanngitsutut maannamut nalilertarpara, Uffe Elleman Jensen oqarpoq.
Nunat Balkanimiittut siunissaat pillugu EU-mi nunanut allanut ministerit Salzburgimi ataatsimiileruttornerisa nalaanni Milosivic toquvoq. Ataasimeeqataasoq danskit nunanut allanut ministeriat
Per Stig Møller aamma oqaseqarpoq:
- Jugoslaviamut ajutoortitserujussuarnikuuvoq eqqarsaatigaaralu Milosivic ajutoortitsisimanngikkaluarpat Balkan pillugu massakkut ataatsimiittariaqarsimassanngikkaluartugut. Jugoslaviaasimasoq naalagaaffiujunnaarpoq Milosivicip politikkiata iluatsinngitsoormat, Per Stig Møller oqarpoq.