Kalaallit Nunaata Ammeriviata ingerlanneqarnera misissorneqartariaqartoq, KNAPK-p siulittaasua Peter Olsen tusagassiutinut nalunaaruteqarnermini, Naalakkersuisut siulittaasuannut Hans Enoksen-imut sakkortuumik piumasaqarpoq.
Puisit amii Canadamiit Ammerivimmut tunineqartarnerini imminut akilersinnaasimassanngippata, KNAPK-p Ammerivimmut isumaqatiginninniarnera eqqunngitsumik tunngaveqarluni ingerlanneqarsimassasoq, KNAPK-p siulittaasua Peter Olsen allappoq.
-Ammeriviup pisortaa eqqunngitsumik ilisimatitsisarsimassappat naalakkersuisut siulittaasuat matumuuna inussiarnersumik ilungersortumilli qinnuigaarput, Ammeriviup ingerlanneqarnera pillugu sukumiisumik misissuisoqarnissaa piaarnerpaamik isumagissagaa, KNAPK-p siulittaasua Peter Olsen allappoq.
Aamma Atassutip partiia ippassaq piumasaqarpoq sukumiisumik misissuisoqassasoq, ullumilu Great Greenland-imi siulersuisuni ilaasortaasimasoq Jens Immanuelsen, sukumiisumik misissuisoqaqqullusilluni piumasaqarpoq.