Kalaallit Odense-mi aallartitaqalerput

Kalaallit Københavnimi angerlarsimaffeqanngitsut ikiorneqarnerunissaat anguniarlugu Københavnip kommuniani aallartitaqartoqalerneratuulli aamma Odensep kommuniani aallartitaqartoqalerpoq.

Odensep kommuniani kalaallinut tunngatillugu aallartitatut qinigaavoq Lea Mørch, taanna aamma kalaallit peqatigiiffianni Umiami siulersuisunut ilaasortaavoq.

Kalaallit Odensemiittut Københavnimituulli qinersinngikkaluarlutik kalaallit peqatigiiffianneersumik kommunimut aallartitassamik toqqaaginnarput.

Lea Mørch ulluinnarni inulerisutut suliffeqarpoq.

Odensep kommuniani kalaallit pisariaqartitaat naapertorlugit immikkut ittunik suliniuteqartoqarpoq.

Ilaatigut isumaginninnermut siunnersortit immikkut ilisimasallit kalaallinit saaffigineqarsinnaasut periarfissiuunneqarlutik, Odensep kommunianeersoq Susanne Kvolsgaard taama oqaluttuarpoq.

Taassuma erseqqissaatigaa, Odensep kommuniata siullertut sulissutigissagaa kalaallit Odensemi najugallit qassit ajornartorsiuteqarnerisa paasinissaat. Taamaalioreerunik qanoq ikiunissamut neqerooruteqarnissartik tullinnguukkumaaritsik, Susanne Kvolsgaardip aviisimut Stiftstidendemut oqaluttuaraa.