Nunaarannguaq Østtimor ukiuni sisamanngulersuni namminersortuuvoq. Namminersulernerli imaannanngitsuuvoq. Nuna kangiani piitsuunerpaavoq, ullormiilli ullormut inuuniarneq ajorsiartuinnavippoq.
Østtimorimi najugaqalissagaluaruit 55-inik ukioqalernissat naatsorsuutigissanngilat. Innuttaasut affangajaasa 3 kr. 50 oori inorlugu ullormut inuussutigisarpaat. Inersimasullu affai allassinnaanatillu atuarsinnaanngillat.
Østtimor Indoniasiamit ukiut sisamat matuma siorna avissaarluni namminersulivippoq. Kangianilu nunanit piitsuunerpaalluni. Inuuniarneq ullormiit ullormut ajorsigaluttuinnartoq Naalagaaffiit Peqatigiit nalunaarput.
FN-ip 1999-imi Østtimorimi namminiilivinnissaq qinersissutigitimmagu nuna namminiilivippoq. Indonisiap sakkutuuisa akerliunertik malunnartinniarlugu innuttaasut 1500-t toquppaat nunalu tamakkerlugu illut 70 procentii sinnerlugit sequtserlugit.
Innuttaasut piitsuunermik kiffaanngissuseqarneq suli misiginngilaat. Østtimorimi innuttaasut 80 procentiisa nunalerineq inuussutissarsiutigaat.
FN-ip nalunaarusiaani allassimavoq Østtimorimi innuttaasut piitsuunerat qaangerniarneqassappat nunap aningaasaatai nunalerinermut tapiissutigineqartariaqartut.
Nunalerisut taperneqartarnissaat FN-imit kissaatigineqarpoq, sulialli imaannaanngitsuunissaa ilimagineqarluni.