Sverigimi umimmaat nungutaalernerat ernummagineqalerpoq, taamaammallu umimmannik Kalaallit Nunaanneersunik Norgeminngaanneersunilluunniit Sverigimut assartuisoqarnissaanik, pinngortitamik illersuiniaqatigiit piumasaqartalerput. Taama Sverigep radioa aallakaatitaqarpoq.
Immikkoortumi Jämtland-imi ukiut 20-it matuma siorna umimmaat 30-iusimasut maannakkut arfineq-marluinnanngorsimapput. Kalaalit Nunaanni umimmaat amerlangaarmata, Kangerlussuup eqqaaniittut arlallit toqorarneqartariaqarsimapput.
Pinngortitaleriffiup umimannik kisitsinerani kingullermi paasineqarpoq, nunatsinni umimmaat ikinnerpaamik 25.000-iusut, taakkunanngalu Kangerlussuup nalaaniittut 10.000-iullutik.
Umimmaqassutsimik ilisimatooq Christine Cuylor Pinngortitaleriffimmeersoq oqarpoq, umimmannik Sverigimut nuussisinnaaneq ajoqutaanavianngitsoq, aatsaalli umimmaat Kangerlussuup nalaaneersuuppata. Taamatulli pisoqassappat pinngortitamut avatangiisinullu pisortaqarfiup aalajangigassarigaa, Christine Cuylor erseqqissaavoq.