Inersimasut meeqqat saaffiginnittarfianut saaffiginnittalerput
Inersimasut amerliartuinnartut ajornartorsiutitik pillugit meeqqat oqarasuaataannut 134-imut saaffiginnittalermata, inersimasunut saaffiginniffiusinnaasoq pilersinneqartariaqalersoq, imminorneq pinaveersaartinniarlugu suliniutinik Paarisami ataqatigiissaarisoq Jette Eistrup oqarpoq.
- Meeqqat oqarasuaatikkut saaffiginniffigisartagaat atorneqartorujussuuvoq, aamma nittartakkami pilersissimasatsinni taaguuteqartumi, ”Inuusuttut akisunnerat”-nut, inersimasut saaffiginnittarput. Tassuuna allagaqarnikkut nittartakkatigullu oqallittoqartarneratigut inersimasut saaffiginniffigisinnaasaannik siunnersuisinnaasunillu pisariaqartitsoqarnera paasivarput. Jette Eistrup oqarpoq nangillunilu: - Taamaammat nuna tamakkerlugu oqarasuaat saaffiginniffiusinnaasoq siunnersuisinnaasorlu inersimasunoortoq pilersinneqassasoq pissusissamisoorsoraarput. Oqarasuaat meeqqat saaffiginnittarfiat 134-i inersimasut amerliartuinnartut saaffigisarpaat. Saaffiginniffiusinnaasumik pilersitsisoqassappat, imaassinnaavoq illoqarfinni ataasiakkaani nammineq kajumissuseq aallaavigalugu siunnersuisinnaasut ikiuussinnaassasut. Aningaasaliinissarput pisariaqarpoq, sulinerlu maannakkut ingerlareersoq iluatsissappat, ukiup uuma naajartulernerani aappaaguluunniit inersimasut saaffiginniffigisinnaasaat oqarasuaat pilersinneqarsinnaalissaaq.
Imminorneq pinaveersaartinniarlugu suliniutinik Paarisami ataqatigiissaarisoq Jette Eistrup taama oqarpoq.