RAL inatsisartunut paasissutissiivoq
Nuummi Royal Arctic Line-p kantiinaani Inatsisartuni ilaasortat naalakkersuisullu ilaat ullumi Royal Arctic Line pillugu paasissutissinneqarput.
Ivalo Egede aperaarput sooq paasissutissiisariaqarnersut.
- Isumaqaratta Inatsisartuni ilaasortat sorpassuarnik aalajangiisarmata tunuliaqutaasinnaasunik tunerusullutigit, Royal Arctic Line-mi tuniniaanermi attaveqaqatigiinnermilu pisortaq Ivalo Egede oqarpoq.
Royal Arctic Line-p pisortaata Jens Andersenip saqqummiinermini Royal Arctic Linep oqaluttuarisaanera kingumut qiviarpaa. Taassuma ilaatigut eqqartorpaa, Royal Arctic Linep nunaqarfinnut sullissinerata taamaatinnera, KNI-miillu nakkutigineqalernera.
- Nunaqarfinnut sullissigallaratta 23 mio. koruuninik sipaakkavut 2005-imut naatsorsuutit naammassippata piginnittutsinnut Namminersornerullutik Oqartussanut tunniunneqassapput, piginnittut namminneq aalajangissavaat taakku aningaasat KNI-mut tunniukkusunnerlugit, naak nunaqarfinnut kiffartuussinerput ingerlatiinnarusukkaluarlutigu KNI-mut ajornerulersitserusunngilagut, Jens Andersen inatsisartunut taama oqarpoq.
Ivalo Egede aperaarput, Royal Arctic Linep tungaaniit inatsisartut sunik paasitissallugit pingaarnerutinneraat.
- Umiarsualiviit. Umiarsualivimmi sulisuulluni malunnartartorujussuugami ulorianarsinikuusoq. Assartukkat amerliartuinnarput, raajarniat, inunnik angallassinerit, assartukkanik assartuinerit imaaginnavipput. Ataatsikkut suna tamarmi ingerlanneqarluni tattoqiffinngornikuugami. Umiarsualivinni soorlu Sisimiuni Nuummi immaqa aamma Aasianni illoqarfinni anginerni ulorianarsinikuugami, tupinnaqaaq ulloq manna tikillugu ajutoortoqarsimannginnami. Ullumilu saqqummiinitsinni pingaarnertut oqariartuutigaarput, umiarsualiviit allisariaqarnerat, taama oqarpoq Royal Arctic Line-mi tuniniaanermi attaveqaqatigiinnermilu pisortaq Ivalo Egede.
