Amnesty International: Unioqqutitsilluni parnaarussisoqartarpoq
USA-ip Irakimi katillugit 14.000-inik suli eqqartuunneqarsimanngitsunik parnaarussaqarnera inuit pisinnaatitaaffiinik illersuiniaqatigiiffiup Amnesty Internationalip sakkortuumik avoqqaarliuteqarfigaa.
Amerikamiut tuluillu Abu Graibip parnaarussiaviani naalliutsitsisarsimanerit eqqarsaatigalugit ilikkagaqarsimanngilluinnartut Amnesty Internationalip Danmarkimi immikkoortortaani pisortaq Lars Norman Jørgensen oqarpoq.
Irakimi sakkulersorneq inggtsikkiartuinnartillugu Amerikamiut Irakimi parnaarussaat amerliartuinnavipput.
Parnaarusaat siorna januaarimi 8000-iusut ukioq manna januaarimi 14.000-nngorsimapput, tamannalu inuit pisinnaatitaffiinut annertuumik sunniuteqartoq Amnesty internatonal nalunaarpoq.
Parnaarussat amerlanersaasa qanoq sivisutigisumik parnaarussaanissartik nalunngilaat, 4000-lli ukiumi ataatsimi parnaarussaaqqareersut qanoq sivisutigisumik parnaarusimaneqarnissartik suli paasisimanngilaat. 100-it arlaqartut ukiut marluk sinnerlugit parnaarusimaneqareersimapput sulilu aamma eqqartuussaasimanatik. Eqqartuusseqqaarani parnaarussisarneq inuit pisinnaatitaaffiinik unioqqutitsinerusoq, Amnesty International erseqqissaavoq.
Lars Norman Jørgensen oqarpoq parnaarussat ilarpassui pinerluttulerinermut inatsisit naapertorlugit pineqaatissiisoqarneq ajornartoq. Aamma oqarpoq parnaarussat Irakimi oqartussanut ingerlateqqinneqaraangamik naalliutsinneqartartut.
Lars Norman Jørgensenip erseqqissaatigaa parnaarunneqartut pikitsitsiniaagaluarpataluunniit piffissaligaanngitsumik parnaarunneqartarnerat inuit pisinnaatitaaffiinut unioqqutitsinerusoq.
Lars Norman Jørgensen oqarpoq danskit naalagaaffiat nunatulli allatut Irakimi sakkutuuliussaqarnermigut Irakimi massakkut pisunut akisussaaqataasoq, iliuuseqannginnermigullu ajornartorsiuteqartoq.