Qeqertarsuarmiinnaanngitsoq Schweiz-imiut aningaasaataat iluaqutigineqartussanngorput. Schweizimiut aningaasaliissuteqartarfiat ThoCon –ip nunatsinni aningaasaaliisinnaanngornera aamma Narsami suliffissanik pilersitsisinnaalissaaq.
Naalakkersuisut Thocon-ip Qeqertarsuarmi Uunartuarsuup ernganik tunisassiulersinnaaneranut sisamanngormat akuersipput.
Thocon-ip akuersissummik pineratigut nunatsinni sikumik tunisassiornermi ingerlatsisoq Greenland Ice Cap Productions pisinnaatitaaffeqalerpoq Qeqertarsuarmi erngup tunisassiarineqarneranik ingerlatseqataanissamut, saniatigullu Narsami sikunik vodka-liornermi tunisassiornermi ingerlatsiviusup Greenland Ice Cap Productions-ip annertusineqarsinnaalerneranut ThoCon-ip aningaasaliisinnaalerneratigut periarfissaqalerpoq.
-ThoCon-ip nunatsinni aningaasaliisinnaalerneratigut Narsami sikunik tunisassiorneq annertusineqarsinnalissaaq. ThoCon-ip
nunarsuarmi annertunerusumik tuniassiornermut ilisimasaqarnera aningaasaliissutillu iluaqutigalugit suliffiit amerlanerusut pilersinneqarsinnaalerput, Greenland Ice Cap Productionimi pisortaq Kaj Egede oqarpoq.
Narsami sikunik tunisassiorneq qerititsiviit ulikkaarneqareernerisa kingorna ukiup annertunersaa uninngasarpoq, tassalu maanna ThoCon-ip aningaasaliineratigut tunisassiornermilu ilisimasaat iluaqutigalugit Greenland Ice Cap Productions-mi ataavartumik tunisassiorsinnaalerneq neriuutigineqalerpoq.