POST Greenland umiarsuarnut bilitsit pillugit Arctic Travel Group-imut isumaqatigiissuteqarpoq.
Ullumi marsip aalaqqaataa aallarnerfigalugu Nanortalimmi, Narsami, Qasigiannguani, Qeqertarsuarmi kiisalu Upernavimmi TELE-POST Centerini umiarsuarnut bilitsinik allanillu Arctic Travel Group-ip angallassinermut tunngasunik nioqqutaanik inniminniisoqarlunilu pisisoqarsinnaalerpoq.
Nunatta kitaani TELE-POST Centerit sinnerini Arctic Travel Group-ip nioqqutai allat umiarsuarnullu bilitsit marsip naalerani pisiarineqarsinnaalernissaat Post Greenlandimit naatsorsuutigineqarpoq.
Sumiiffinni TELE-POST Center-it, tassa sullissiviit umiarsuarnut billetsinik tuniniaanerat ammarneqaraangat, tamanna qarasaasiami www.post.gl-kut kiisalu TELE-POST Centerini nivinngaanikkut ilisimatitsissutigineqartassaaq.
Siunissami TELE-POST umiarsuarnut billetsinik tuniniaassussinerminut atatillugu akilerneqartarunnaarluniluunniit taperneqartarunnaassaaq, taamaattumillu Arctic Travel Group-imut isumaqatigiissut malillugu billetsimut tunisamut ataatsimut qaatigut 125 kr.-imik akiliisitsisassalluni.
Umiarsuarnut billitsinik tuniniaaneq qaammatip matuma siuliani aallartittussaagaluarpoq, sullissisussanilli pikkorissartinneqarmat qaammammik kinguaattooreerluni tassa aallartippoq.