Arnat inuusuttut amerliartuinnartut stressernerup kingunerisaanik inortunik ernisarnerat Danmarkimi misissorneqarsimasoq, aviisimi B.T.-mi allaatigineqarpoq.
Danmarkimi arnat inuusuttut inortunik ernisut 1995-imiit 2004-imut 51 procentimik qaffariarsimapput.
Qaffariaat taanna nakorsanit ernisussiortunillu arajutsineqarpoq.
- Arnat ukioqqortunerit inortunik ernisarnerat naammattuugassaajuarpoq, arnalli inuusuttut inortunik ernisut qaffariarsimanerat tupaallannarpoq, taama oqarpoq, Danmarkimi Rigshospitalimi nakorsaaneq Jens Langhoff-Roos.
Nangipporlu:
- Arnat inuusuttut inortunik ernisarnerisa 51 procentimik qaffariaataata peqqutaa ilisimanngilarput, imaassinnaavorli kingulliarsuit arnartaat ulapinnerulersimasut. Ullumikkut arnat inuusuttut ilaquttaminnik suliffimminnillu ulapputeqartorujussuusarput, tamannarpiaasimasinnaavorlu inortunik meerartaartarnermut peqqutaasoq, Jens Langhoff-Roos B.T-mut oqarpoq.