Nunanit allanit mingutitsinerujussuaq Asiip tikkuarpaa
Avatangiisinut Pinngortitamullu naalakkersuisup Asii Chemnitz Narupip Avatangiisit pillugit Sisimiuni ataatsimeersuartoqarnera iluarisimaarpaa. Taanna oqarpoq, avatangiisit mingutsinneqarneranut tunngasut aaqqitassarpassuit akornanni eqqaaveqarnermut eqqakkanullu tunngasut suliassatut nukinginnarnerpaatut isigigini.
- Nammineq uanga isumaga malillugu, suliassat nukinginnarnerit ilagivaat eqqaaveqarnermut eqqakkanullu tunngasumik aaqqiissuteqarnissarput. Aamma taanna pillugu pisortaqarfik suleqatigalugu pilersaarusiorparput qanoq taassuma tungaatigut inerisaaqqissinnaanerluta, inatsisitigullu aamma aaqqitassat suunersut, Asii Chemnitz Narup oqarpoq.
Asii Chemnitz Narup Avatangiisit pillugit Sisimiuni ataatsimeersuarnermi peqataanngilaq Inatsisartuni ataatsimiittussaanini pissutigalugu. Oqalugiaatissaraluanili ima allassimasoqarpoq; Nunat tamalaat akornanni suleqataanerput pingaartittuartariaqarsoraara. Nunanit allanit mingutitsineq annertoorujussuaq silaannakkut immakkullu nunatsinnut annguttarpoq, issittumilu pinngortitaq uumasuilu uagut nappatigut malussarinnerpaajummata tamanna ulluinnarni inuunitsinnit attuivoq.
- Ilisimaneqartutuut Igaliko aftale-mik taallugu nunarput, Danmarki, USA-lu atsioqatigiipput, suleqatigiissutigissassatta ilagivaat aamma avatangiisinut tunngasut apeqquteqarpassuit aamma suleqatigiissitaqarpoq taakkua suliassuisinnaanerinik qulaajaallutik isumaqatigiinninniarnissamut piareersaapput, taamaammat ataatsimeersuartuninngaanniit uanga apuutikutsuussavara tassunga suleqatigiissitamut, oqarpoq.
Asii Chemnitz Narup aperaarput uuliamik nunamut mingutitsineq aammalu umiarsualivinni maralloqarpallaarneq aamma eqqartorneqarsimasut, tamannalu qanoq aaqqiiviginialersaarneraat.
- Tassa uagut nunatsinni akisussaaffigivarput imartarput 3-7 miilit tungaanut avasitsigisumut killillugu. Taassuma avataatigut danskit naalagaaffiata akisussaaffigivaa, taamaammat tamanna uagut danskillu akunnitsinni suleqatigiissutigisassaqqippoq, taamaammallu tigussaanerusumik qulequtaannaanngitsumik ataatsimeersuarnerminngaanniit tigusaqariarutta immikkut taanna maluginiarumaarparput, taama oqarpoq Avatangiisinut pinngortitamullu naalakkersuisoq Asii Chemnitz Narup.