Aalisarnermut piniarnermullu naalakkersuisup Finn Karlsen-ip Great Greenland-illu akornanni aaqqiagiinngissuteqarnermi suli aaqqitassaqarpoq.
Hans Enoksen-ip paatsuugassaanngitsumik utoqqatsissuteqarnera soorunami tigoreerparput, kisianni suli amigaateqarpoq, Great Greenland-ip siulersuisuini siulittaasoq Anders Brøns oqarpoq. Tassalu illumik sanasitsisimaneraaneq suli inaarneqanngilaq.
- Ukiut qulit 15-t missaani bestyrelsemi inissisimatillunga illumik ataatsimilluunniit taamak akisutigisumik sanatitsisoqarsimanngisaannarnikuuvoq. Mikaali nammineq direktørboligeqarpoq taannalu pioreersoq 90-t naajartuaarnerani pisiarinikuuarput. Taavalu 2000-miunngikkuni 2001-imi pilersaarut Air Greenlandip lejlighed-nik sisamanik sanatitsinera bestyrelsemi saqqummiunneqarpoq, akia 2 mio 350.000-ummat, imaappoq kvadrat meterinngorlugu 10.000-t inorlugit akeqarmat bestyrelse-mi tamarmiulluta isummersimavugut oqarluta; ajunngilaq akiminut naleqquteqaaq sipaaruteqarluarsinnaavugut, taavalu direktørerput oqarfigalugu taanna projekti tiguniartigu. Namminerluunniit uagut sanatinngilarput, kisianni projekti ingerlareersoq tiguarput, Anders Brøns oqarpoq.
Taanna aperaarput; tassa illuliortoqanngila 7 mio. koruunilimmik?
- Taamaattoqanngilluinnarpoq!
- Qanoq ilillunimiuna taanna oqaluttuaq pinngortoq?
- Inuttaa aperigukku immaqa pitsaanerussaaq akisinnaassavaatit, Anders Brøns akivoq.
- Kisianni tassa tusaamaneqarpoq 7 mio. koruuninik nalilinnik illuliortoqarsimasoq. Taanna qanoq ilillugu tusaamasaq tusaamasaajunnaarsissavisiuk?
- Immaqa pitsaaneruvoq saassussimut apeqqutigigukku, Anders Brøns akivoq.
Great Greenland-ip siulersuisuini siulittaasoq Anders Brøns Jens Thorin-imut taama oqarpoq.
Anders Brønsip apersorneqarnera tamakkiisoq Itisiliinermi nalunaaqutaq arfinermiit aallakaatinneqartumi tusarliunneqarpoq. Nittartagaq KNR naggat gl titarneq uingasoq Itisiliineq alakkarukku Itisiliineq tamaat tusarnaarsinnaavat.