Vancouverimi borgmesteri assakaasulimmik issiavilimmiittup, 2010-imi ukiuunerani olympiademi illoqarfimmini unammersuaartoqalerpat erfalasulisaarnissani piumasarisimavaa.
Talii niuilu nukillaarnikuupput, tamannali uniffigerusunngilaa.
Vancouverimi borgmesterip, Sam Sullivanip, 19-inik ukioqarluni sisorartilluni qungatsini napimmat timaa nukillaarpoq. Talini atorsinnaanngikkaluarlugit erfalasumik tigummisinnaalluartutut imminut isigaaq.
Ingeniørit namminnerlu piumassusertik malillugu ikiuukkusuttut qinnuigisimavai issiavimminut assakaasulimmut erfalasup ilineqarfissaanik sanaqqullugit.
IOC-imi præsidentip Jacques Rogge-p erfalasoq borgmesterimut tunniuppagu, issiavik assakaasulik innaallagiartortoq atorlugu erfalatitsinissani takorloorpaa.
-Sungiusarniarlunga Vancouverimi inoqannginnersiornissara ajornarnerpaatittarpara. Biilit uninngasarfiini piffissani qanoq ilisukkulluunniit sungiusartarpunga, borgmesteri CBC News-imut oqaluttuarpoq.