Bagdadimi aneqqusaanngillat
Muuamaamik upperisallit Irakimi naalaffinni ullumikkut qinusussaapput, aporaattoqarnissaalu pinngitsoorniarlugu illoqarfiit pingaarnersaanni Bagdadimi illoqarfeeqqanilu qanitttuaniittuni pingasuni innuttaasunik aneqqusinnginnermik Irakimi Naalakkersuisut naalakkiipput. Unnuarli aneqqusaajunnaarneq ualeru nalunaaqutaq sisamat tungaanut sivitsorneqassaaq.
Aqqusinerni inuit naammattuukkatik politiit tigusarisarniarpaat, naalaffinnukaagaluarpataluunniit, ministeriunerup allaffianit Irakimilu nunanut allanut ministeriaqarfimmiit tusarfiit taama ilisimatitsipput. Shiamuslimit naalaffiisa pingaarnerit ilaat pingasunngormat qaartartumeerneqareersorlu, inuit 130-init amerlanerit peqqarniitsuliornernit, aallaasersornernit qaartartumeerinernillu toqutaammata, tamanna aneqqusiunnaarnermik peqqusinermik kinguneqartariaqarsimavoq.
Pingasunngormat unnukkut ippassarlu peqqarniisaartoqarnerani toqutaasut amerlanersaat sunnimuslimiupput, tamakkulu shiamusliminit kamaqisunit Irakimi sumiiffinni amerlasuuni saassunneqarlutik inuartarineqarput. Toqutaasorpassuit saniatigut illorpassuit sunnimuslimillu naalaffii saassunneqarlutillu aseruatiterput.
Peqqarniisarnerit politikkikkut ingerlaannaq aamma sunniuteqarput. Sunnimuslimit peqqarniisaarfigineqarnerat pissutigalugu, Irakimi naalakkersuisortaarnissaq pillugu isumaqatigiinniarnissanit partiit sunnimuslimit annersaat tunuarpoq, shiamuslimit peqqarniisaarnernut amerlanernut pisuutillugit.