Naalakkersuisunut ilaasortap Finn Karlsenip eqqunngitsumik tunngaveqarluni pasillernera Nuummi politiinit sukkanerpaamik misissuiffigineqarusuppoq.
Finn Karlsen eqqunngitsumik tunngaveqarluni Great Greenlandimi pisortamut pasillernera peqqutigalugu Kalaallit Nunaanni Sulisitsisut Peqatigiiffiat politiinut tunniussissuuvoq.
- Suliaq sumut killinnersoq oqaaseqarfigisinnaanngilara, politimester Sten Thomsen oqarpoq.
Finn Karlsen unnerluutigineqarsinnaasoq politiinit nalilerneqassappat inatsisartunit Finn Karlsenip unnerluutigineqarsinnaannginera peeqqaartariaqassavaat. Politiinut tunniussineq tiguneqaqqammerpoq, unnerluutigineqarnissarlu suli ungasikkallaarluni.