Naalakkersuisuusimasut atornerluisimanerat Demokraatit qaqileqqikkusuppaat

Naalakkersusuusimasut Jens Napaattooq aamma Rasmus Frederiksen, aningaasanik atuivallaarsimasutut akisussaassusaat paasiniarlugu misissuiffigineqarnissaannik Demokratineersup Jens B Frederiksen-ip piumasaqarnini, ullumikkut tunuartimmagu, ima nassuiaaserpaa.

- Taamanikkut siunnersuut suliarineqarmat nalunarami taamanikkut Kalaallit Nunaanni politimesteri paasiniaanermik aallartitsissanersoq, taamaammat siunnersuut siunnersuutigaara, kisianni kingorna paasivara politimesterip nammineq paasiniaaneq aallartissimagaa, misissuinerlu ingerlammat taanna naammagisariaqarparput. Demokraatiniit taannarpiaq kissaatiginikuugatsigu taamaammat misissorneqarnera nuannarivarput, Jens B. Frederiksen oqarpoq.

Taanna aperaarput inuiaqatigiit aningaasaataannik atuisimasutut akisussaassuseqartariaqarsimanerat misissorneqartariaqarsorinnginneraat.

- Tassami pinerluttoqarsimanersoq misissorpaat, taassumalu ataani misissorneqarpoq akileraarutit aningaasaataannik eqqunngitsumik atuisoqarsimanersoq, taannalu pinerluttulerinermi inatsisip ataaniippoq, oqarpoq. Nangipporlu:

- Kisianni akisussaassuseqarnera inatsisartut inatsisaat naapertorlugu pinerluttulerinermi inatsit naapertorlugu unioqqutitsisimasinnaaneri annikinnerusutut maannakkut isigivara, kisianni maannakkorpiaq isumaqanngilagut saqqummernissaa pisariaqartoq, kingusinnerusukkut takujumaarparput politimesterip suliani naammassippagu qanoq ilioqqissanerluta; Jens B. Frederiksen oqarpoq.

Aperaarpullu:

- Pinngitsuutinneqassappatami taava?

- Soorunami aallaqqaataaniit uagut oqarnikuuvugut aamma siunnersuummi uanga oqaatiginikuuara sorpiaap ilumoortuunerata paasiniarneqarnissaa pisariaqartoq, tassa assigiinngitsutigut isumaqagiinngittoqarnikuugami pisuuneq pillugu. Soorunami ataqqissavarput pisuunngitsuunerarlugit nunatsinni politiit eqqartuussiviulluunniit aalajangissappassuk, taanna tamatta ataqqisariaqarparput, Jens B. Frederiksen oqarpoq.

- Siunnersuut taamanikkut sanagakku, pissutsit qanoq innersut nalunarsimapput. Aamma taamanikkut naluarput politimesteri misissuinermik aallartitsissanersoq, taamaammat taamatut siunnersuuteqarsimavunga. Kisianni tassa massakkut paasivarput, politimesterip misissuineq aallartissimagaa, misissuinerlu maannakkut ingerlammat naammagisariaqarparput, Jens B Frederiksen oqarpoq.

Inuiaqatigiit aningaasaataannik aningaasarpassuarnik atuisimaneranni, akisussaanerat paasiniarneqassannginnersoq, Jens B Frederiksen aperineqarami ima akivoq: - Pinerluttoqarsimanersoq misissorneqarpoq. Aamma akileraartartut aningaasaataannik eqqunngitsumik atuisoqarsimanersoq misissorneqarpoq. Taanna aamma pinerluttulerinermut inatsisip ataaniippoq, kisianni akisussaanermi inatsisartut inatsisaat naapertorlugu unioqqutitsisimasinnaaneri tassani annikinnerusutut maannakkut isigivara, aamma maannakkorpiaq saqqummernissaa pisariaqarsorinngilara. Politi mesterip misissuinera naammassippat qanoq iliussanerluta paasiumaarparput. Pinngitsuutinneqassappata qanoq pisoqassanersoq Jens B Frederiksen aperineqarami ima akivoq: - Aallaqqaataaniilli pisariaqarsorisimavara suna ilumoortuunersoq paasiniarneqassasoq. Assigiinngitsutigummi isumaqatigiinngittoqarnikuuvoq. Soorunami ataqqineqarumaarpoq politiit eqqartuussiviillu aalajangernissaat.

Demokratineersoq Jens B Frederiksen, taama oqarpoq.